Placer ug Alang-Alang maoy nidaog sa Sinulog mihakot og P1M nga premyo

Tweet

Ni Bryner Laurito Diaz

Gideklarar nga mananaog ang Culturang Placereño sa Placer Masbate ug Tribu Lingganay sa Alang-alang, Leyte sa Sinulog 2012 alang sa kategoriya sa Sinulog Based ug Free Interpretation.

Naangkon sab sa duha ang best in costume ug best in musicality sa ilang tagsa-tagsa ka kategoriya.

Apan ang kanhi mananaog sa miaging tuig nga ang Sinanduloy Cultural Troupe sa Tangub City, Misamis Oriental ug ang Tribu Himag-ulaw sa Placer, Masbate nakakuha lamang sa ikaduhang ganti ning tuiga.

Samtang nakakuha sa ikatulong dapit sa Sinulog Based ug sa Free Interpretation nga kategoriya mao ang dakbayan sa Carcar ug ang Karatong Festival sa Dulag, Leyte.

Gihakot sab sa Sta. Catalina Negros Oriental ug sa Abellana National School ang ika-upat ug ika-lima nga dapit sa Sinulog Based Category.

Nakab-ot sab sa Lumad Basakanon sa dakbayan sa Sugbo ug sa Toledo National High Vocational School ang ika-upat ug ikalimang dapit sa Free Interpretation.

Ang dakbayan sa Carcar mao sab ang napiling kampiyon sa street dancing samtang ang ikaduha ug ikatulong dapit nakuha sa Tangub City ug sa Culturang Placereño.