Tulo ka milyong dumudoong sa Pista Señor

Tweet

Ni  Bryner Laurito Diaz

Gibana-bana nga miabot sa tulo ka milyon ka tawo ang misaulog sa kapistahan ni Sr. Sto. Niño matod pa sa hefe sa Cebu City Police Office nga si Chief Sr. Supt Melvin Buenafe dihang nahinabi kini sa mga tigbalita.

Sumala pa ni Buenafe nga ang nindot nga kahimtang sa panahon ug ang presensya sa mga artista maoy nakatampo sa pagpuswak sa bagang doot sa katawhan atol sa maong kasaulogan.

Dugang pa ni Buenafe nga mokabat sa usa ka milyon ang naa sa kadalanan aron mosaksi sa mga mananayaw subay sa carousel route samtang ñang laing duha ka milyon nagsaulog sa kapistahan sa lain-laing mga lugar sama sa mga malls, sa Cebu City Sports Center ug sa Basilica del Sto. Niño.

Basi sa  obserbasyon sa kapulisan nga nagmalinawon ang kasaulogan sa Pista Señor tungod kay walay natala nga dagkong kaso atol sa maong kasaulogan.

Dugang pa ni Buenafe nga bisan pa sa kabaga sa doot sa katawhan nga mitambong sa kapisatahan sa Señor Sto Niño nagmabinantayon ang mga sakop sa kapolisan ug kanunay kining andam sa bisan unsang panghitabo.

Mapasalamaton usab si Buenafe sa mga katawhan sa pagbulig sa kapolisan sa pagpatunhay sa kahusay ug kalinaw nga maoy usa ka paagi sa pagdasig sa dumudoong sa laing nasod sa pagbalik dinhi sa mosunod pang mga katuigan tungod kay malinawon man ang maong kasaulogan.